ദോഹ: യാത്രക്കാരിയെ വിമാനത്തിൽ കയറ്റാൻ ജീവനക്കാരൻ വിസമ്മതിച്ചതിന്, പ്രസ്തുത വ്യക്തിക്ക് നഷ്ടപരിഹാരം നൽകാൻ ഖത്തറിലെ ഇൻവെസ്റ്റ്‌മെൻ്റ് ആൻഡ് ട്രേഡ് കോടതി ഒരു എയർലൈൻ കമ്പനിയോട് ഉത്തരവിട്ടു. ഭൗതികവും ധാർമ്മികവുമായ നാശനഷ്ടങ്ങൾക്ക് യാത്രക്കാരിക്ക് 20,000 റിയാൽ നഷ്ടപരിഹാരം നൽകണമെന്ന് കോടതി വിധിച്ചു.

ഖത്തറിലെ അറബ് മാധ്യമമായ അശ്ശർഖാണ് വാർത്ത റിപ്പോർട്ട് ചെയ്തത്. യാത്ര തടസ്സപ്പെട്ടതിലെ മാനഹാനിയും സാമ്പത്തിക നഷ്ടവും ചൂണ്ടികാണിച്ച് അഞ്ച് ലക്ഷം റിയാൽ നഷ്ടപരിഹാരം ആവശ്യപ്പെട്ടാണ് പരാതിക്കാരി ഇൻവെസ്റ്റ്‌മെൻ്റ് ആൻഡ് ട്രേഡ് കോടതിയെ സമീപിച്ചത്. 

 സംഭവത്തിൽ ഉൾപ്പെട്ട എയർലൈൻസിൻ്റെ പേര് പത്രത്തിൻ്റെ റിപ്പോർട്ടിൽ വെളിപ്പെടുത്തിയിട്ടില്ല.

സംഭവ ദിവസം ദോഹയിൽ നിന്നും മറ്റൊരു അറബ് രാജ്യത്തിന്റെ തലസ്ഥാനത്തേക്ക് യാത്ര ചെയ്യാനായി വിമാനത്താവളത്തിലെത്തിയ യുവതി ചെക്ക്-ഇൻ സെക്യുരിറ്റി നടപടികൾ പൂർത്തിയാക്കി. അതിനു ശേഷം ബോർഡിംഗ് ഗേറ്റിലെത്തി യാത്രാ രേഖകൾ എയർലൈൻ ജീവനക്കാരനെ ഏൽപ്പിച്ചപ്പോൾ, യാത്രക്കാരി വൈകിയെന്നും വിമാനത്തിൽ കയറാൻ അനുവദിക്കില്ലെന്നും അയാൾ പറഞ്ഞു.

വിമാനം പുറപ്പെടുന്നതിന് ഏകദേശം ഒരു മണിക്കൂർ സമയം ബാക്കി ഉണ്ടായിരുന്നതിനാൽ, യാത്രക്കാരി ജീവനക്കാരനിൽ നിന്ന് അനുമതി നേടാൻ തുടർച്ചയായി അപേക്ഷിച്ചു. 

എന്നാൽ ജീവനക്കാരൻ അപേക്ഷകൾ ന്യായീകരണമില്ലാതെ നിരസിക്കുകയും യാത്രക്കാരിയോട് അനാദരവോടെ പെരുമാറുകയും ചെയ്തു. ഇതേ തുടർന്ന് യാത്രക്കാരിക്ക് ദേഹാസ്വാസ്ഥ്യമുണ്ടായി.

 അടിയന്തിര വൈദ്യസഹായം തേടേണ്ടതായും വന്നു. അപ്പോഴേക്കും വിമാനം പുറപ്പെട്ടതിനാൽ യാത്ര പൂർണമായും മുടങ്ങുകയായിരുന്നു. ഇത് വിവിധ നഷ്ടങ്ങൾ വരുത്തിയെന്ന് ചൂണ്ടികാണിച്ചായിരുന്നു വനിതയുടെ പരാതി.

യാത്ര ദുരിതത്തിലായ യാത്രക്കാരിയെ പ്രതിനിധീകരിച്ച് ഖത്തരി ലോയേഴ്‌സ് അസോസിയേഷൻ ബോർഡ് അംഗം അറ്റോർണി അബ്ദുല്ല നുഐമി അൽ ഹജ്‌രി തെളിവുകളും രേഖകളും സഹിതം ഒരു നിയമ മെമ്മോറാണ്ടം സമർപ്പിച്ചു. പ്രസക്തമായ സിവിൽ നിയമ ലേഖനങ്ങൾ ഉദ്ധരിച്ച് യാത്രക്കാരിയുടെ ഭൗതികവും ധാർമ്മികവുമായ നാശനഷ്ടങ്ങൾക്ക് അദ്ദേഹം നഷ്ടപരിഹാരം അഭ്യർത്ഥിച്ചു.

യാത്രാ ടിക്കറ്റ് മുഖേന യാത്രക്കാരന് എയർലൈനുമായി കരാർ ഉടമ്പടി ഉണ്ടെന്നും, ഒരു തലസ്ഥാനത്ത് നിന്ന് മറ്റൊന്നിലേക്ക് യാത്രക്കാരിയെ കൊണ്ടുപോകാൻ കമ്പനി ബാധ്യസ്ഥരാണെന്നും അറ്റോർണി വാദിച്ചു.

യാത്രാ നടപടിക്രമങ്ങൾ പൂർത്തിയാക്കിയിട്ടും കൃത്യസമയത്ത് എത്തിയിട്ടും കമ്പനി അവരെ കയറാൻ അനുവദിക്കാത്തത് വിമാനത്തിൻ്റെയും ടിക്കറ്റിൻ്റെയും വില നഷ്‌ടമായതിൻ്റെ കാര്യത്തിലും, നേരിടേണ്ടി വന്ന കഠിനമായ പെരുമാറ്റം മൂലമുണ്ടായ ധാർമ്മിക നാശനഷ്ടങ്ങൾക്കും ഇത് കാരണമായെന്നും വാദിഭാഗം പറഞ്ഞു.